الحواوشى اللذيذ على الطريقة الاسكندرانى
طبعا بتحبى الحوواشى وكل أسرتك بتحبه ويا سلام لو كان على الطريقة الإسكندرانية هيبقى أحلى وألذ وكلنا بنحب الساندويتشات السخنة ودايما بنبحث عن طرق شهية ومختلفة لتقديمها النهاردة هنعمل الحواوشى اللذيذ على الطريقة الاسكندرانى ولا اشهى من أى ساندوتش لا تفووووتك
المقادير:
*لعمل العجينة:
1/2 كيلو دقيق
ملعقة كبيرة خميرة
1/2 كوب زبادي
3 ملاعق زيت
3/4 كوب ميه
رشة ملح
رشة سكر
*لتتبيلة اللحمة:
1/4 كيلو لحمة
2 حبة بصل
كوب بقدونس
كوب فلفل رومي مفروم
1/2 كوب طماطم مفرومة
ملعقة صغيرة بهارات
ملعقة صغيرة كمون
فلفل حامي حسب الرغبة
ملح وفلفل
زيت زيتون أو ذرة للدهن
الحواوشى اللذيذ على الطريقة الاسكندرانى
طريقة التحضير:
1- أول حاجة جهّزي العجينة، وده بإنك تخلطي الدقيق والخميرة والملح والسكر وتقلبيهم كويس في العجانة أو بالمضرب وتحطي عليهم الميه والزبادي والزيت وتعجني العجينة كويس لحد ما تبقى متماسكة في إيديك.
2- قسمي العجينة كرات صغيرة وادعكيهم كويس بإيديك وسيبيها لمدة 1/4 ساعة لحد ما تتخمر.
3- اخلطي اللحمة مع البصل والبقدونس والفلفل والطماطم وتبليها بالملح والفلفل واعجنيها كويس، وممكن تضيفي رشة شطة زي ما تحبي.
4- بعد ما العجينة تتخمر رشي الرخامة بالدقيق وافردي كرات العجينة دي عليها وادهني العجين بالزيت.
5- حطّي جزء من خليط اللحمة على عجينة وبعدين غطيها بعجينة تانية ويكون الجزء المدهون من تحت، واضغطي عليهم علشان يتماسكوا، ممكن تستخدمي طبق أو قالب صغير بحجم الرغيف اللي انتي عايزاه وتضغطي به على العجينة علشان تكون متساوية من الأجناب وتقطعي العجينة الزيادة، وبكده تكون كل الأرغفة عندك حجمها متساوي.
6- ادهني الرغيف بشوية زيت بسيط وحطيه في صينية ودخليه الفرن وسيبيه لمدة 20 دقيقة لحد ما العجينة واللحمة تستوي، وبعدين قدّميه..
وبالصحة والهنا,,,
